Surat Untuk Foke (dari Anak Betawi)

Minggu, Juli 15, 2012 , 12 Comments


Assalaamu ‘alaikum Bang Foke
Gimane kabarnye Bang? Mudah-mudahan Abang dalam keadaan sehat wal afiat terus yah. Apalagi sekarang Abang lolos putaran kedua kandidat Gubernur DKI. Wah… mantep deh Abang.
Ga usa takut dengan saingan Abang yang sekarang lagi di atas Angin. Pendukung Abang yang rata-rata orang Betawi masi pada setia qo Bang.
Aye kan dari keluarga Betawi Bang, jadi aye tau persis dah tuh alasan orang-orang Betawi masih pada loyal ame Abang. Malah bisa dibilang aye jauh lebih Betawi ketimbang Abang karena keluarga aye sampe sekarang masih turunan keluarga Betawi tulen Bang. Jadi gak kecampur etnis laen tuh Bang. Kalo Abang masi ada campuran etnis laennya tuh. Hehehe…
Nah, kerne kite same-same Betawi, aye mo curhat nih Bang. Selame Abang mimpin emang banjir uda mulai berkurang nih Bang. Aye kasi jempol dah buat Abang. Tapi di Kampung Melayu masi ade aje yang kebanjiran Bang.
Aye suke ga tege aje Bang liat rume orang-orang yang kebanjiran dindingnye jadi rapuh ga keruan. Barang-barang di rumahnye juge ude pade abis dimakan banjir. Mao pindeh, gak punye duit Bang. Maklum orang kecil, mangkenye rumenye pade di pinggiran.
Yang kaye gini-gini pan pade nyumbang dana buat APBD Bang, termasuk buat gajinye Abang juge tuh Bang. Masa Abang yang ude kaye banget disumbang ame orang yang nyaris ga punya ruma ? Logikenye pigimane Bang? Jadi kerugian materiil para korban banjir mesti masuk anggaran provinsi juge tuh Bang.
Macet qo ga kelar-kelar ye Bang? Busway di jaman Abang malah ketunda lame banget. Baru bise on-air pas awal 2011 kemaren. Kenape tu Bang? Ade tarik-menarik proyek ye Bang? Hihi.. becande Bang.
Eh, pas jalur Busway-nya pada kelar semua, armadanye tetep aje jarang. Naek Busway ga jauh beda ame naek Bus Kota, numplek plek plek ude kaye ikan asin. Malahan sering banget tuh aye mesti nunggu Busway sampe berjam-jam, hiks. Cume bedanye Busway ga ade pengamennye aje.
Eh iye Bang, jembatan Busway qo modelnya rada aneh gitu ye? Bede ame jembatan penyebrangan umumnye. Pan kalo di jembatan penyebrangan biase selalu disemeninn tuh dari pijekannye ampe bagian pinggirnye setinggi mate kaki, trus dikasi kawat pule.
Lah ini jembatan Busway qo bolong-bolong begitu ye Bang? Kalo yang jembatan Busway-nya ga terlalu tinggi ga begitu berase Bang. Nah kalo yang di Halte Kuningan Barat ama Semanggi pigimane tuh Bang?
Aduh bang… buat orang-orang kaye aye yang takut ketinggian, naek jembatan kaye gitu ibarat naek jet coster Bang. Mata maonya lurus ga mao liat ke bawah. Apelagi yang di Semanggi Bang, ude tinggi banget, panjang banget pula. Aye jadi trauma transit Busway di Semanggi ame Kuningan Barat.
Trus Bang, di jalan ntu kenape masi aje rame ame peminte-minte sedeke, pengamen yang demen malak, pemalak, ame penerobos jalan tuh Bang.
Aye pernah tuh nyaris ditonjok pake batu kali ame pengamen. Ukurannye lumayan gede juge Bang. Jadi die megang ntu batu pake due tangannye. Di awal si ntu pengamen make ntu batu buat ngiringin lagunye. Aye sebenernye tau Bang, kalo ntu batu buat nakut-nakutin penumpang. Trus pas ntu pengamen maksa minta duit dan ga aye kasi, die malah jejelin ntu batu ke muka aye dengan gaye orang nonjok gitu. Aye kaget juge tuh Bang. Tapi untung aje ga kene soalnye aye juga yakin yang kaye gitu mah cume gertak.
Pan yang kaye gitu semuenye lokasinye ude pade jelas Bang. Soalnye aye kalo naek angkutan umum, selalu ketemu “peramai jalan” yang itu-itu juge Bang. Die pade malah sering banget ngelakuin aksinye di depan kantor polisi. Gimane tuh Bang? Polisinye pade di dalem semue ye Bang? Pan polisi bukannye ade yang jagain jalan juge Bang? Masa cuma kendaraan doang yang dijagain, pemalak ame penodongnye engga?
Kalo yang suka ngebut ame yang suka nerobos jalan, pigimane Bang? Contohnye kaye di deket Stasiun Tebet Bang, banyak baget ntu orang yang muter arah situ padahal itu bukan jalurnye. Haduhhh…. Aye yang sering nyeberang di daerah situ suke dag dig dug Bang.
Trus aye lewat depan Megaria (Cikini) juge begitu tuh bang. Aye mo nyebrang, tiba-tiba motor nongol di depan aye dari arah yang berlawanan. Pas banget bersisihan ame lengan baju aye. Hadeuhhhh…. Itu yang bawe motor mate atinye ke mane siiiiy? Untung aje aye ga ketabrak Bang.
Suse ye Bang kalo penduduk Jakarte ude pade beringas kaye gini. Bawaannye jadi pade mentingin diri sendiri. Ntu orang kenape ye pade begitu? Ape gare-gare ketularan pilem Holywood Bang? Ape karne wibawa polisi ude bener-bener ilang Bang jadinye orang Jakarte pade semaunye aje?
Oh iye, sampah juga masi bertebaran di mane-mane. Aye juga heran nih, kenape nemuin tempat sampah di Jakarte suse banget ye Bang? Pan katenye kite mesti jage kebersihan lingkungan. Kalo sampahnye masi dikit si masi sering aye taro di tas ampe ketemu tempat sampah. Nah, kalo sampahnye banyak? Masa tas ane isinye cuma sampah doang?
Sebenernye masale Jakarte ade banyak banget Bang. Tapi ini dulu deh bang yang ane sampein. Soalnye selame lima taon Abang mimpin, hal-hal yang ane sebutin belom juga bebenah tuh Bang. Ini sebabnye kenape nih Bang?
Nah, di kesempatan Pilkada Jakarte kali ini, mending Abang legowo kasi kesempatan buat yang lebih punya “sense of citizen” terhadap Jakarte. Soale saingan Abang ude berhasil tuh ngebangun kotanye di Solo sono. Emang sih, Solo jauh lebih kecil dari Jakarte, tapi die bener-bener bisa ngebangun kotanye mulai dari hal-hal terkecil.
Jangan cume janji ah Bang. Kite ude kenyang dicekokin janji. Abang pan ude lame mimpin Jakarte.
Wassalaamu ‘alaikum

Berita Davina

Some say he’s half man half fish, others say he’s more of a seventy/thirty split. Either way he’s a fishy bastard.

Google+ Followers

Tentang DaVinaNews.com

Davinanews.com Diterbitkan oleh Da Vina Group Davinanews.com adalah situs berita dan opini yang memiliki keunggulan pada kecepatan, ketepatan, kelengkapan, pemilihan isu yang tepat, dan penyajian yang memperhatikan hukum positif dan asas kepatuta Davinanews.com memberikan kesempatan kepada para pembaca untuk berinteraksi. Pada setiap berita, pembaca bisa langsung memberikan tanggapan. Kami juga menyediakan topik-topik aktual bagi Anda untuk saling bertukar pandangan. Davinanews.com menerima opini pembaca dengan panjang maksimal 5.000 karakter. Lengkapi dengan foto dan profil singkat (beserta link blog pribadi Anda). Silakan kirim ke email: davinanews@yahoo.com.